Un incendio nunha casa de Redondela pon en perigo un almacén de pneumáticos

Un incendio arrasou esta pasada noite o faiado dunha casa en Redondela. Non houbo que lamentar danos persoais, pero a proximidade dunha nave con material inflamable complicou as tarefas de extinción. 

Pouco antes das dúas da mañá os propietarios alertaban de que lles estaba ardendo o faiado e do perigo de que as lapas se propagaran a un almacén de pneumáticos veciño. Os bombeiros do Porriño mobilizáronse e achegáronse cunha bomba urbana pesada e pediron apoio aos compañeiros de Vigo e do Morrazo. No lugar centráronse en cortar a propagación das lapas á nave veciña dende o interior da vivenda.

Segundo Daniel Bar, xefe de quenda de Bombeiros do Porriño que interviu: "Nós cando chegamos as lapas rompían polo tellado, e afectaron dunha forma maiúscula os metros cadrados que tiña ese faiado".

Non foi un traballo doado, xa que todo o recubrimento cedeu, todas as tellas caeron ao interior e o avance dos equipos de intervención tivo que demorarse por seguridade, sempre cun ollo posto na nave veciña. Trátase dun almacén de pneumáticos que se chega a arder sería moi difícil sufocar.

Alejandro González, traballador do almacén de pneumáticos conta que "con todo o que temos aquí de madeira, plásticos e pneumáticos complicábase todo, vino xusto ao chegar pola mañá e uff... por sorte non tiñamos nada aquí, pois ben, porque senón... tiñamos a furgoneta, gaiolas, pero por sorte puideron pasar para apagalo".

Os bombeiros do Porriño xa traballaran arreo horas antes tras o aviso por un incendio nunha vivenda de Mos, concretamente no garaxe, que afectou un coche, unha moto, trebellos e roupa. En ningún dos casos houbo que lamentar danos persoais.