Un incendio provoca danos importantes nunha vivenda de Duarría, en Castro de Rei

Aínda era de noite cando comezou a arder unha casa do barrio de Salgueiros, na parroquia castrexa de Duarría. Por fortuna, unha veciña avisou a tempo o residente na vivenda, que é fillo do dono e que saíu ileso.

Alberto Gallego, residente na vivenda: "Espertei ás seis da mañá. Sentín berrar no camiño a veciña, que viña de traballar e que petou á porta. Mirei e vin que estaba ardendo o cuarto ese".

Malia a colaboración veciñal e a rápida intervención dos bombeiros de Vilalba, o suceso causou importantes danos materiais. As lapas calcinaron boa parte da cuberta, diversos mobles e mais os principais electrodomésticos da casa, valorados en miles de euros.

Alberto Gallego, residente na vivenda: "Ardeu o cuarto da beira, con todo o que había dentro, unha lavadora, dúas neveiras e dous conxeladores. Tamén arderon un moble de cociña e un sofá".

Tocante ás causas do incendio, todo apunta a que se puido orixinar por un curtocircuíto.