Un Lugo moi inocente cae no Ruta da Prata (2-0)

O Lugo viu como se finalizaba a xeira de partidos sen perder. Non caía desde o 22 de setembro e encadeaba oito xornadas seguidas puntuando. Pero no Ruta da Prata volveron os erros do comezo da temporada e foi un equipo moi inocente e previsible. 

Á media hora xa perdía por dous a cero. Clavería marcou o primeiro cunha gran manobra co calcaño á saída dun córner e Rufino Lucero aproveitou un grave erro na saída de xogo do Lugo para poñer o segundo tanto do partido. O conxunto galego levou o peso do partido pero atopouse cun rival moi sólido en defensa e que concedeu moi poucas ocasións de gol.