Un luns laborable en Vigo, cun cheo total en Samil, que semella un domingo de xullo

As Rías Baixas gozan este luns dun día de verán logo dun mes de xuño en que o tempo non foi especialmente de praia. Así que, areais como Samil colgan hoxe o cartel de non hai localidades.

Samil loce hoxe xa como de tempada alta, aínda que o gran desembarco de turistas, os da primeira quincena de xullo, está aínda a cinco días de distancia. Pero os máis pequenos xa están de vacacións e os adultos que traballan á mañá non teñen problema en pasar unha tarde de praia neste areal urbano e próximo de Vigo.

Os trinta graos e o sol espléndido animaron este luns os vigueses a sacaren os parasoles, os protectores solares, porque como moita xente nos di, aquí hai mono de praia e necesidade de sol e vitamina D despois dun outono e dun inverno que se fixo longo.

Luns de traballo, pero parece un domingo de xullo. A maioría son hoxe da terra, ou dos arredores, e aínda hai poucos turistas. Para uns e para outros despois dun outono e dun inverno duros, aquí hai ganas de sol, de mar e de area. Por diante quedan tres meses de gozo dos areais e do Atlántico en cada punto das Rías Baixas.