Un matrimonio de Arteixo queda ferido ao estoupar unha tubaxe da caldeira da súa casa

Un matrimonio, de 82 e 84 anos, quedou ferido en Arteixo pola explosión dunha tubaxe de vapor do sistema de calefacción da súa casa. A muller e o home foron trasladados ao Complexo Hospitalario da Coruña (CHUAC) con queimaduras nas pernas.

O suceso ocorreu nunha vivenda unifamilar situada na travesía de Oseiro. Sorprendeu este martes a última hora da tarde, contra ás 21:00, a veciñanza da zona, onde se deixou sentir a explosión desa tubaxe de vapor dunha caldeira situada no andar inferior da casa.

Os dous feridos son un matrimonio, Carmen e Manuel, os habituais residentes da vivenda. Os dous presentaban queimaduras na parte inferior do corpo e que permanecen ingresados no CHUAC, logo de seren atendidos no mesmo lugar por persoal do 061. 

A consecuencia da explosión rebentou unha ventá, que saíu disparada, e unha das paredes interiores da casa que separaba a cociña do comedor. Os bombeiros do parque comarcal situado en Arteixo e o persoal de Protección Civil do propio concello comprobaron que a orixe da explosión estaba nesa tubaxe dunha cheminea de leña.