Os servizos de extinción galegos reoriéntanse para loitar contra grandes lumes
Os servizos de extinción galegos reoriéntanse para loitar contra grandes lumes
Nos últimos anos cambiou a tipoloxía e agora hai menos incendios pero máis perigosos
Períodos estivais máis longos por mor do cambio climático e masas forestais máis amplas e con máis material combustible están a cambiar a tipoloxía dos incendios que sofren os montes galegos nos últimos anos: hai menos pero son máis perigosos.
"Os lumes que tivemos o ano pasado eran incendios que tiñamos coas características meteorolóxicas e de combustible, que collían rapidamente un tamaño considerable. E poñíase moi rápido ao límite a capacidade de extinción, cando non fóra dela", manifesta Manuel Rodríguez, director xeral de defensa do monte da Xunta.
O plan de prevención e defensa contra os incendios forestais de Galicia, o Pladiga, incide cada vez máis na loita contra os grandes lumes recorrendo este ano a ferramentas específicas para enfrontarse a eles.
"Por unha banda, a xeración de unidades específicas para a extinción deste tipo de grandes lumes e, outra das novidades, é aumentar o número de brigadas de extinción helitransportadas", comenta.
Diante do novo panorama xa se está a traballar nunha nova lei de loita integral contra os incendios, que mellora o dispositivo de extinción pero integrando a xestión do territorio. Isto supón promover as actividades agrícolas e gandeiras nas zonas con maior presenza de lumes forestais.
