Un músico de 16 anos é o organista oficial da colexiata de Xunqueira de Ambía
Un músico de 16 anos é o organista oficial da colexiata de Xunqueira de Ambía
Recuperan a tradición de harmonizar as liturxias dos domingos coas melodías do impoñente órgano barroco
Un instrumento contruído en 1759 é un dos máis antigos e mellor conservados de Galicia
O órgano barroco ibérico da colexiata Santa María a Real de Xunqueira de Ambía deixará de estar mudo, porque volve soar para harmonizar as misas dos domingos.
O seu novo organista oficial é un mozo de 16 anos, Hugo Pérez. El é desde o pasado domingo o encargado de acompañar as liturxias coas melodías deste órgano barroco do xéculo XVIII, un dos máis antigos e mellor conservados de toda Galicia.
"Para min é toda unha honra porque é un órgano moi especial e poder tocalo é todo un privilexio", asegura Hugo Pérez, o novo organista da colexiata de Xunqueira.
Unha tradición que se perdera hai máis de 30 anos e que o seu novo párroco, Luis Javier González, tiña o soño de que volvese soar para acompañar as misas.
"Un dos meus soños desde que cheguei é que este impoñente órgano barroco ibérico volvese cumprir co seu obxectivo xenuíno para o que foi creado, que é para harmonizar, para acompañar a liturxia", explica o párroco.
Hugo Pérez é estudante de órgano no conservatorio de Ourense. A súa participación nos ciclos de música antiga que organiza a súa profesora Marisol Mendive levouno ata esta colexiata. Este último trimestre estívose preparando coa axuda da súa profesora e agora este músico estará tocando nas misas da colexiata este órgano construído en 1759.
"Empecei o domingo pasado e bastante ben, é moi especial", di o organista, Hugo Pérez.
"Co son deste órgano a liturxia cobra un son celestial", di o párroco Luis Javier González.
Un son moi especial que se poderá escoitar todos os domingos na misa das 12 na colexiata Santa María a Real de Xunqueira de Ambía.
O órgano barroco de Xunqueira de Ambía é do século XVIII.
