Nova agresión en Urxencias do CHUAC: un paciente agride unha auxiliar de enfermería
A afectada xa foi dada de alta, e o persoal esixe de novo medidas para evitar novas agresións
Imaxe de arquivo dunha protesta no CHUAC para esixir medidas contra as agresións (Satse-Arquivo)/Europa Press)
Un paciente agrediu na cara a unha auxiliar de enfermería en Urxencias do complexo hospitalario universitario da Coruña (CHUAC), uns feitos que se produciron o xoves pola mañá e polos que a afectada xa foi dada de alta.
Así o confirmaron fontes próximas ao caso consultadas por Europa Press en relación a uns feitos que se produciron no mesmo día da convocatoria de protestas por parte da Xunta de Persoal para esixir medidas inmediatas contra as agresións.
Desde a xerencia da área sanitaria da Coruña e Cee sosteñen que algunhas xa se implementaron e que se segue con actuacións a este respecto, coa creación de grupos de traballo e apoio psicolóxico, entre outras.
Fronte a iso, desde a representación sindical sosteñen que as medidas preventivas "seguen sen estar implantadas e as e os profesionais sen ter a formación para abordar estas situacións". Con todo, as fontes consultadas sinalaron que se lle comunicou á afectada que tiña que poñer denuncia ante a Policía.
Desde a xerencia, e sobre o último caso, recalcaron que ao hospital acoden todos os días ao redor dunhas 700 persoas "e todos son debidamente atendidos". "Pero, por desgraza, hai pacientes que producen altercados e non por iso se deixan de atender".
