Un xaponés entra como membro de honra na Real Academia Galega

A Real Academia Galega terá a partir deste sábado un membro xaponés, un membro de honra. E non sen mérito.

Takekazu Asaka leva case 40 anos estudando a lingua, a gramática e a cultura galegas. Traduciu ao xaponés os nosos poetas máis insignes, estudou os matices das variedades dialectais e ata pulicou estudos de sociolingüística. Grazas a el, o Días das Letras Galegas celébrase en Toquio.

Atopamos a Takekazu Asaka preparando o acto deste sábado en Cambados, onde vai ser recibido como membro de honra da Real Academia Galega. Trae con el unha soprano e unha pianista coas que leva anos traballando en Toquio espallando poemas de Rosalía, Cabanillas e Novoneyra. 

"Foi un grande éxito para difundir a vosa cultura no Xapón".

Cóntanos que entrou en contacto co galego mentres estudaba Románicas en Madrid. A través do xornal A Nosa Terra.

"O meu primeiro traballo é de Rosalía e Castro. Cabanillas ten un estilo que foi máis difícil de entender para min".

Gústalle a beleza que hai na diversidade e nos matices.

"Hai viño, peixe, todo riquísimo. Na montaña é outra cultura, ou a mesma cultura, pero con caracteres diferentes".

Confésanos que para el é un orgullo que aquí os amigos lle chamen Takiño.

"Take non ten sabor".

Para el teñen importancia os aspectos subxectivos e afectivos da linguaxe. Tamén estuda a sociolingüística.

"A maneira de falar vai cambiando pouco a pouco. Agora hai neofalantes e a lingua séguese falando, pero eu penso que hai que conservar a forma antiga".

Cre que galegos e xaponeses temos en común a experiencia da emigración dun pobo traballador e nostálxico.

Takekazu Asaka: "Mañá vai ser un día formidable, marabilloso".

O día en que, xa xubilado, o honra a Academia do idioma que o namorou cando aínda era estudante