Un xuíz ve indicios de participación do número 3 do PSOE andaluz nun secuestro
Un xuíz ve indicios de participación do número 3 do PSOE andaluz nun secuestro
Os feitos aconteceron en febreiro en Maracena, onde Noel López foi alcalde
O xuíz pídelle ao Tribunal Superior andaluz que lle tome declaración
O Xulgado de Instrución número 5 de Granada cre que hai indicios de que o secretario de Organización do PSOE andaluz puido estar implicado no secuestro da concelleira de Maracena Vanessa Romero o pasado febreiro.
Como Noel López é deputado autonómico, o xuíz granadino elevou a causa ao Tribunal Superior de Xustiza para que lle tome declaración.
A través dun comunicado, López aclarou que non está imputado. Negou calquera relación co secuestro e asegura que o único indicio contra el é a declaración do único detido polos feitos, a quen se refire como unha persoa desequilibrada.
A dirección dos socialistas andaluces di que é cedo para pronunciarse. O seu secretario xeral, Juan Espadas explicou que "non podemos dicir nada porque non coñecemos o contido do sumario. El está absolutamente igual, non tivo acceso ao sumario".
López foi alcalde de Maracena ata hai un ano, cando o sucedeu Berta Linares. O pasado 21 de febreiro, un home secuestrou á súa concelleira de Urbanismo, Vanessa Romero, que logrou liberarse e fuxir. O presunto secuestrador era o mozo da alcaldesa.
Os investigadores cren que detrás do suceso pode haber un caso de corrupción urbanística.
