Unha adega do Ribeiro aposta pola tracción animal para traballar as viñas

Mellora a calidade do solo e beneficia as cepas. Ese é o motivo polo que  Lázaro Moreno, propietario de Adega Laudes, en Cenlle, decidiu introducir, de xeito experimental, a tracción animal para labrar as viñas. Un método menos invasivo que xa empregan noutras zonas cunha fonda tradición vitivinícola como A  Rioxa ou Francia. Por agora tan só usa animais nos tres viñedos cos que elabora o seu viño máis exclusivo. 

Para levar a cabo os traballos conta con Rodrigo Gómez e a súa mula Trigueña. Foi a través da Asociación Galega de Tracción Animal como se iniciou nun oficio que, di,  foi evolucionando e conta cada vez con máis demanda.  Eles xa estiveron traballando en distintos puntos de España.