Unha avalancha en Papúa Nova Guinea sepulta máis dun milleiro de casas
Unha avalancha en Papúa Nova Guinea sepulta máis dun milleiro de casas
Polo momento non hai cifras oficiais de vítimas, pero calcúlase que hai máis de 300 persoas soterradas
A avalancha de terra que na madrugada do venres golpeou e sepultou unha aldea remota do norte de Papúa Nova Guinea soterrou polo menos 300 persoas, segundo indican medios locais.
A falla de información oficial, polas dificultades de acceso ao lugar e as precarias comunicacións no país, o xornal Post Courier citou o parlamentario Aimos Aken, que lle pediu axuda ao Goberno nos labores de rescate porque o alude en Kaokalam "soterrou polo menos 300 persoas".
O parlamentario engadiu que o desastre natural ocorrido na provincia de Enga, 600 quilómetros ao noroeste da capital, Port Moresby, sepultou polo menos 1.182 casas.
Malia o elevado número de vítimas, son poucos os corpos que se conseguiron rescatar, segundo a cadea estatal australiana ABC, pola falla de maquinaria para mover as pedras e a terra que sepultaron a aldea.
A ONG Care Australia, presente en Papúa Nova Guinea, indicou nun comunicado que a estrada de acceso á aldea está bloqueada e "levará un tempo considerable despexala", o que atrasará os labores de axuda e a chegada de información sobre as vítimas.
Malia as dificultades, un equipo de rescate estatal chegou ao lugar para avaliar a situación e asistir ás vítimas, sinala a ONG.
Na zona afectada, as choivas intensas e os asolagamentos son habituais e tamén se teñen rexistrados desprendementos menores.
Pobreza e illamento
Malia a súa riqueza en recursos naturais, boa parte da poboación do país vive na extrema pobreza e atópase illada polo déficit de comunicacións e infraestruturas, sobre todo, en lugares remotos coma o da catástrofe actual.
![](https://img-g24-crtvg.flumotion.com/prog24/2024/20240525/202405255488WD-PAPUA-LANDSLIDEUGC-DRONE_O__frame_3744.png)