Unha avaría causa atrasos xeneralizados na rede ferroviaria galega

Xornada de caos a deste xoves nas estacións de tren galegas. Unha avaría eléctrica na Coruña desencadeou unha sucesión de atrasos que afectou a toda a comunidade. 

"O tren das sete da mañá aínda sen saír", dicía dúas horas máis tarde unha muller na estación de San Cristovo. 

Coma ela, centos de pasaxeiros asistían impotentes a unha avaría que desde primeira hora impedía a saída ou chegada de trens.

Os operarios explicaban a viva voz o problema: "Hai unha avaría eléctrica, non sae nin entra ningún tren".

"Tampouco hai megafonía?".

"Non funciona a megafonía".

Entre os pasaxeiros medraba o desconcerto ante a falta de información e de alternativas.

"Por agora non saben nada, nin cando se vai arranxar nin nada. Tampouco nos poñen autobuses", dicía unha moza.

"Busquen alternativas, di, desculpen as molestias e acabouse", lía un home no correo electrónico que lle acababa de enviar Renfe.

Coa estación bloqueada, Renfe comeza a transbordar pasaxeiros en autobús ata o apeadoiro de Uxes, en Arteixo, a oito quilómetros da cidade.

"Atopamos o bus para vir, non sabiamos nada, os revisores non sabían nada, e aquí estamos, en Uxes, collendo o tren para Santiago", conta un estudante.

Ata as once da mañá, non se restableceu a circulación en dúas das seis vías da estación coruñesa. Unha terceira entrou en servizo pola tarde.

Pero os atrasos xa se estenderan por boa parte da rede ferroviaria galega. O tren procedente de Vigo que debía chegar a mediodía facíao unha hora e cuarto máis tarde. E os que saían da Coruña para estar en Ourense ás nove fixérono tres horas e media máis tarde.

"Os das 8 da mañá, tres horas, catro horas de atraso", dicía unha viaxeira ao chegar á cidade das Burgas.

Os atrasos trastornaron a xornada de moitos dos viaxeiros. Un mozo conta: "Perdín a reunión, o meu día de traballo non serviu".

Outra explica que no seu vagón "había xente que tiña que facer exames e non chegaban e tiveron que pedrille xustificantes a Renfe".

E unha muller conta: "Tiña unha cita ás dez da mañá en Vigo e agora a ver se me atenden".

Pola tarde, as demoras persistían.

"Tiven atraso pola mañá e agora pola tarde para volver", relataba unha muller. Ao seu lado, un home lamentaba: "Tiñamos que saír ás 6 e ata as 7 non imos saír".

Renfe achaca o problema a un corte na subministración eléctrica que anulou o sistema de sinalización da estación da Coruña. Responsabilizan a empresa subministradora. Pero Naturgy nega a existencia de avaría ningunha e di que o problema estivo no sistema eléctrico interno da estación, que depende do Adif. 

O administrador de infraestruturas ferroviarias informa de que xa se recuperou a subministración, pero que os atrasos acumulados impedirán que a situación se normalice durante o xoves.