Un pesqueiro dos sesenta navega pola ría de Arousa convertido en barco escola
Un pesqueiro dos sesenta navega pola ría de Arousa convertido en barco escola
A bordo do Chasula apréndese a valorar a pesca tradicional e a riqueza das augas galegas
En 1960 unha embarcación do cerco, unha tarrafa, saía a pescar por primeira vez con 17 mariñeiros a bordo. Hoxe chámase Chasula porque ese é o nome do aparello co que pescaban fanecas.
Na navegación programada para hoxe oito tripulantes, todos da zona, aprenden a estrutura da ría de Arousa, a máis grande das galegas, na que afloran máis nutrientes, e coñecen os aparellos que se usaban na pesca tradicional e por que eran mellores para o ecosistema. Na popa de rabo de galo a mariñeira e divulgadora Lidia Nieves comeza coa charla.
"Falar das riquezas das rías, de todos os seus recursos, e de intentar manter todas estas profesións do mar. Estas saídas están enfocadas á xente de aquí, de diferentes xeracións, e que poidamos compartir coñecementos", conta á TVG.
"Un universo de sabedoría que vemos que está rematando aos poucos, con novas maneiras de ver e de facer. Estase indo algo irrecuperable", explica Isidro Mariño, o patrón do Chasula.
A visita achéganos ás bateas. Na ría de Arousa hai 2.200 das 3.200 de toda Galicia. A viaxe de dúas horas inclúe unha degustación de produtos do mar derivados da pesca artesanal a bordo, o que os modernos chaman unha experiencia sensorial.
