Unha enfermeira galega arrasa nas redes sociais con publicacións sanitarias

Esta é unha das últimas publicacións de @bel_enfermeria: "Hoxe douche cinco consellos para unha correcta hixiene do sono".

Esta enfermeira de Camariñas, que actualmente exerce no Hospital de Ourense, tamén estudou Filoloxía Hispánica e ten milleiros de seguidores nas redes sociais, como divulgadora sanitaria.

Belinda Ínsua Fuentes, enfermeira, filóloga e 'instagrammer': "Sempre quixen dedicarme a algo relacionado coa sanidade. Eu defínome como enfermeira".

Acaba de facer a residencia en Saúde Mental, unha especialidade da que tamén informa nas súas redes.

"A sanidade é un mundo que che require estar actualizada todos os días. Subir contido, buscar información e que estea baseada na evidencia científica é algo que a min me enriquece", explica.

Todo empezou, lembra, cando estaba estudando e tivo que recorrer ás publicacións doutras persoas na procura de axuda.

"Entón decidín facelo eu para axudar outras persoas que estean na miña mesma situación".

Acaba de concluír a especialidade, pero non ten plans de deixar nin o hospital de Ourense nin a súa dedicación ás redes sociais, onde tamén atopou espazo para o humor e o entretemento.