Unha farmacéutica de Ribadavia triunfa nas redes cantando consellos

A punto de cumprir medio século de historia, a farmacia Lameiras é das máis antigas de Ribadavia, pero tamén das máis innovadoras.

O mérito é de Noa Ruíz, a segunda xeración, que se vale das redes sociais para dar consellos dermatolóxicos cun peculiar estilo.

"Se queres coidar a túa pel, o primeiro que debes facer é limpar con micelar", canta nunha estrofa que adapta o clásico de Julie Andrews e que lle valeu o premio Unnico á mellor idea dixital.

Noa Ruiz Lameiras, Farmacéutica e instagramer: "As farmacias parece que estamos aquí estáticas, sen facer nada, pero os tempos seguen correndo e hai que adherirse ao que vén".

Gústalle cantar e busca referencias tamén actuais, que conecten co público máis novo.

"Como está de moda a Rosalía, Wisin and Yandel e todos estes... pois dixen, imos adaptar esta canción. Ves que a xente reproduce, reproduce, reproduce... Mesmo me din: teño a túa canción na cabeza en vez da orixinal", explica Noa.

Quere, sobre todo, atraer a xente nova: "Porque agora hai moitísimos problemas que ás veces non sabemos detectar e hai que amosarlle interese á xente que vén".

O premio que acaba de recibir, di, é un estímulo para seguir traballando.