Unha investigación da USC ábrelle a porta a novos tratamentos para a diabetes
Unha investigación da USC ábrelle a porta a novos tratamentos para a diabetes
A incidencia da doenza a nivel mundial aumentou máis dun 40 % desde o 2019
A investigación do CIMUS acaba de ser premiada pola Real Academia Galega de Ciencias
A investigación do Centro de Medicina Molecular da Universidade de Santiago descubriu un mecanismo esencial da diabetes tipo 2, que fai que o fígado produza un exceso de glicosa. O estudo revelou que se debe a unha modificación nunha das proteínas más importantes no proceso de produción da glicosa. Conseguir bloqueala ábrelle a porta a novos tratamentos.
"O bloqueo desta modificación axuda a reverter ou a reducir os niveis de glicosa no sangue. Establécese esta modificación desta proteína como unha diana terapéutica", explica Uxía Fernández Paz, investigadora do CIMUS.
A diabetes é a sétima causa de morte en todo o mundo, segundo a Organización Mundial da Saúde. A súa incidencia está crecendo dun xeito alarmante debido a hábitos de vida pouco saudables.
"É unha doenza que sofren 540 millóns de persoas en todo o mundo, cun aumento do 42 % desde o 2019. Está crecendo a unha velocidade alarmante. Vai da man da obesidade e o sedentarismo", explica a investigadora do CIMUS.
En Galicia hai máis de 200.000 persoas afectadas pola diabetes, unha doenza que se non se controla pode provocar perda de visión, insuficiencia renal ou problemas cardiovasculares.
