Unha nena de Vigo proclamouse campioa mundial de cálculo mental

Lola Martínez, de 10 anos de Vigo, e Diego Venticinque, de 7 e de Madrid, proclamáronse este sábado grandes campións do campionato mundial de cálculo mental Aloha que se celebrou no parque de atraccións de Madrid, ao resolver en 5 minutos setenta operacións aritméticas, para o que contaron coa axuda do ábaco tradicional xaponés soroban.

Canda eles, outros 63 nenos, procedentes de países como México, Venezuela ou Panamá, entre outros, resolveron a proba sen ningún erro e tamén se proclamaron grandes campións.

Lola Martínez, que sinalou que lle gusta “todo” do cálculo mental e das matemáticas, que levaba só “uns meses” practicando e que antes da proba estaba “moi nerviosa”, pero que esperaba non ter ningún fallo nas respostas.

Ademais de Martínez e Venticinque, outros tres nenos españois, Miguel da Flor, de Cidade Real e de 6 anos; Nacho Gómez, de Valencia e 6 anos, e Iker Díaz, de Huelva e de 13 anos, proclamáronse campións, que significa que tiveron un ou dous erros como máximo nas 70 operacións.

Un total de 600 nenos de 40 países, 140 deles de España, participaron na proba, que contaba con operacións matemáticas simples como sumas, restas, multiplicacións e divisións e outras máis complexas como fraccións, raíces cadradas ou potencias.

A proba tivo lugar este sábado, e os premios entregáronse pola tarde, nun acto no que estaban presentes tamén familiares e profesores dos participantes. A profesora mexicana María Primavera Carranza acudiu á proba con catro dos seus alumnos de Michoacán (México), dos cales un se proclamou gran campión, e expresou que sente moi “feliz” e “orgullosa”:

“É o traballo seu de todos os días”, para o que se adestraron durante seis meses. Santiago Castro é o alumno de Carranza que se proclamou como gran campión, veu a Madrid acompañado dos seus pais e levaba adestrándose un ano: “Síntome orgulloso. Antes da competición sentíame nervioso, pero despois sentinme máis confiado”.

Ademais, asistiron diplomáticos como a embaixadora de Panamá en España, Itzel Patiño, que se congratulou por ter en Madrid os seus novos compatriotas, dos que dixo que son “o futuro da patria”: “Panamá vai crecer na medida que vostedes seguen crecendo como estudantes dedicados”.

O responsable de cooperación internacional da embaixada de México en España, Jorge Sánchez, felicitou os seus compatriotas e animounos a “seguir por este camiño, a seguir aprendendo”.

O programa de cálculo mental Aloha naceu en Malaisia en 1993, está destinado a nenos entre 5 e 13 anos e, segundo datos da organización, só en España uns 10.000 alumnos de 750 centros asisten a actividades extraescolares deste centro de estudos, nun método que, en dúas horas de clase á semana, mestura os exercicios de cálculo con dinámicas de xogo.

Aloha, que colaborou con EFE na difusión deste contido, asegura que con estas actividades poténcianse capacidades como a concentración, a memoria fotográfica ou a creatividade.