Unións Agrarias reclama prezos dignos para o leite ás portas dunha nova renovación dos contratos

Os gandeiros galegos seguen cobrando menos polo leite ca noutras comunidades. Din que son as industrias as que impoñen ese diferencial alegando menos custos de produción.

"Eses catro céntimos menos supoñen 127 millóns de euros que deixan de cobrar os gandeiros galegos", explica Óscar Pose, responsable do Sector Lácteo de Unións Agrarias.

Antes do 31 de marzo teñen que renovarse o 90 % dos contratos do leite e dende Unións Agrarias reclaman prezos xustos.

"Temos o mellor leite de España, temos o maior número de produtores e a maior cantidade de produción e polo tanto non hai xustificación para cobrar menos, o único que pedimos é xustiza", di Miguel Tomé, coordinador provincial de Unións Agrarias en Lugo.

Reclaman negociacións reais e non imposicións de prezos por parte da industria e a necesidade dun mediador que faga cumprir os contratos.

"Ao mellor temos que ir á distribución a explicarlle á sociedade que industrias e que marcas lle fan dano ao sector galego e están facendo que desaparezan miles de explotacións", destaca Félix Porto, Secretario de Coordinación Sectorial e Área Externa de Unións Agrarias.

Sinalan que apenas quedan en Galicia 5.300 explotacións de leite e que cada ano desaparecen máis de 350.