Veciños de Maguxe, en Ames, piden que se rocen as leiras da contorna

A vexetación apenas deixa ver algunhas casas do lugar de Maguxe, en Ames. As pólas, os toxos e o mato das leiras lindeiras entran polos seus peches e teñen medo de que un lume o acabe limpando todo.

"Claro, temos medo de que en vez de limpala os propietarios a limpe o lume, parece que agardan a iso".

"Pedimos non ter as árbores entrando nas nosas propiedades, se hai lume ardemos".

"Conforme está, se alguén planta lume é imposible apagar isto" lamentan os veciños.

As parcelas son de varios propietarios aos que non coñecen nin dan localizado. Malia que a lei os obriga a manter o terreo rozado, non o fan. Por iso son os veciños os que, desesperados, tentan cortar a vexetación que ameaza e mete sombra nas súas casas.

"Tes que comprar ou pedir prestadas máquinas que non tes, e acabas entrando para limpar neses terreos que tampouco son teus, é un problema".

"Levo 28 anos aquí e todos os anos teñe que meterme a limpar eu, menos o dono deste pequeno anaco que sí cumple e limpa. O resto, nada", explican os afectados.

Xa denunciaron o problema ante as administracións, pero, polo momento, non houbo resposta. Piden que o Concello actúe de xeito subsidiario canto antes porque chega a época de máximo risco de incendios.

"Varias veces presentamos escritos ante o Concello e ante a Xunta, pero ninguén nos fai caso".

"Tería que haber 50 metros de faixa de seguridade entre o monte e as casas, non os hai nin de broma".

"Que metan un tractor e manden a factura despois aos donos, que eles si poden saber perfecamente quen son", comentan os veciños.

En 2006 xa viviron un incendio na aldea e non queren que nada igual se volva repetir, e menos cando as silvas dos veciños entran, literalmente, polas súas casas.