Veciños do Xistral maniféstanse contra a macrocentral hidroeléctrica
Veciños do Xistral maniféstanse contra a macrocentral hidroeléctrica
O informe de Augas de Galicia, que é determinante, non autoriza a construción
Á unha da tarde xuntáronse na igrexa de Recaré, nas proximidades do lugar onde iría a menor das balsas que recolle o anteproxecto.
Esixen que se paralice o proceso de construción dunha macrocentral hidroeléctrica no Xistral, polo impacto irreversible que tería na contorna e porque suporía a fin do modo de vida nesta zona.
O anteproxecto, presentado polo Ministerio para a Transición Ecolóxica, ten un informe desfavorable de Augas de Galicia, xa que cortaría canles fluviais. Este informe é determinante.
A veciñanza xuntou máis de 4.400 sinaturas de apoio e presentou 160 alegacións no período de consultas.
No manifesto que leron lembraron que a terra que herdaron non é deles, que é un préstamo dos seus fillos e que deben devolvela nas mellores condicións.
