Venezuela anuncia a detención de dous españois por un suposto plan para matar a Maduro

O ministro do Interior de Venezuela, Diosdado Cabello, anunciou a detención de dous cidadáns españois, dous estadounidenses e un checo, implicados nunha suposta operación que tiña como obxectivo levar a cabo actos "terroristas".

Segundo o ministro, na operación incautáronse de máis de 400 armas e algúns dos capturados buscaban levar a Venezuela "un grupo de mercenarios" co propósito de asasinar o mandatario Nicolás Maduro, e outros dirixentes do chavismo.

Nunha comparecencia só para medios públicos venezolanos, Cabello detallou que os españois foron capturados en Porto Ayacucho, capital do estado Amazonas, e que "teñen vínculos" co Centro Nacional de Intelixencia (CNI) español.

Fontes do Goberno desmentiron que os arrestados pertenzan ao CNI, aínda que non puideron precisar máis detalles sobre esas detencións.

A Embaixada de España en Venezuela pediulle ao Goberno dese país ter acceso aos dous detidos para verificar as súas identidades e a súa nacionalidade e, de ser cidadáns españois, coñecer de que se lles acusa exactamente e que poidan recibir toda a asistencia necesaria.

Fontes do Ministerio de Exteriores informaron a EFE de que a Embaixada enviou unha nota verbal ao Goberno de Venezuela con esa petición, e aseguraron que se "velará en todo momento pola protección e os dereitos de calquera español detido en Venezuela".