Visibilizar a presenza de mulleres nas carreiras STEM esperta vocacións entre as nenas

Visibilizar a presenza de mulleres nas carreiras STEM (acrónimo en inglés que fai referencia a ciencia, tecnoloxía, enxeñería e matemáticas) e contribuír así a que as menas escollan este tipo de tarefas. É o obxectivo deste Día Mundial da Muller e a Nena na Ciencia, declarado pola ONU hai dez anos.

Sempre houbo presenza das mulleres na ciencia. No pasado, cos seus logros agochados moitas veces tras os nomes dos homes. E hoxe, aínda, con menor visibilidade e menor acceso aos postos de mando. Pero están: no espazo, na programación algorítmica, na enxeñería industrial ou no laboratorio. 

"Nos campos de biomedicina somos maioría de mulleres, pero á hora de ser investigadoras principais ou ocupar postos de dirección, pois redúcense as ratios", declarou Angélica Figueroa, que xefa dun grupo de investigación sobre o cancro do INIBIC.

Nun coloquio organizado pola Confederación Empresarial da Coruña, alumnas de ciencias analizaron con profesionais consolidadas por que anos atrás as mulleres avanzaron en campos como a informática, onde agora volver ser minoría.

"Simplemente demostra que leva pasando toda a vida e que pode volver pasar, pero que se pode arranxar", declarou Lucía Cibeira, estudante de Ciencias Tecnolóxicas en 2º de BAC.

"Se analizamos o mundo laboral, si que hai medidas para favorecer a presenza de calquera talento, sexa do xénero que sexa, pero eu penso que hai nesgos inconscientes. Hai un moi notorio que se coñece como Efecto de Jennifer e John, onde vemos que ante dous currículos exactamente iguais o do home está mellor valorado ou se promove máis", comentou Angélica Figueroa,  xefa dun grupo de investigación sobre o cancro do INIBIC "
 

"Agora mesmo hai que impulsar as nenas para que se poidan ver no futuro como científicas", dixo Dolores Sáenz, estudante de Ciencias no CPR Montespiño.