Vitoria fundamental e de prestixio do Baxi Ferrol na República Checa
Vitoria fundamental e de prestixio do Baxi Ferrol na República Checa
O equipo ferrolán gañou ao Brno (59-73) na segunda xornada da Eurocup Women e presenta a candidatura para ocupar unha das dúas primeiras posicións
Gran partido de Claire Melia e Gala Mestres
O Baxi Ferrol sumou a primeira vitoria na fase de grupos da Eurocup Women. Fíxoo na pista do Tany Brno (59-73) equipo que vai ser o gran rival para meterse nos dous primeiros postos.
O equipo checo, que gañara na primeira xornada, saíu por todas e marcou de inicio unha boa vantaxe (15-8). Aguantou ben ese momento complicado o Baxi e igualou o partido no comezo do segundo cuarto no que incluso colleu algunha pequena vantaxe. Ao descanso a igualdade era máxima (35-36).
O terceiro cuarto deixounos grandes momentos de baloncesto do Baxi que se foi dez arriba (37-47). Reaccionou o equipo local (44-47) pero non chegou a culminar a remonta e o cadro ferrolán entrou por diante no último cuarto (46-53).
Apoiadas na grande actuación da irlandesa Claire Melia (21 puntos) e de Gala Mestres (19) o Baxi mantivo a diferenza nos momentos da verdade e consolidou a diferenza de arredor dos dez puntos (53-63) para acabar festexando un triunfo que pode marcar o futuro en Europa.
