Volven abrir o proceso para retirar os bens non disputados do Pazo de Meirás

O Xulgado de primeira instancia número un da Coruña volveu abrir o proceso para a retirada por parte da familia Franco dos bens non disputados do Pazo de Meirás.

A xustiza estima de forma parcial os recursos da Avogacía do Estado, a Xunta, a Deputación e os concellos de Sada e A Coruña.

Dá ás partes vinte días para que indiquen o tempo que consideran necesario para que os Franco retiren os bens que non son obxecto de controversia e para que designen as persoas que participarán no proceso.

O decreto indica que se requirirá a autorización da Xunta respecto ao traslado de bens de interese cultural (BIC) .

Isto abre a vía reclamada xa por todas as administracións, excepto a Xunta, que é a que ten competencias, de declarar o conxunto de elementos como bens de interese cultural, pois aínda que non variaría a súa propiedade limitaría o seu traslado.

Na actualidade son BIC as estatuas do Mestre Mateo, a biblioteca de Emilia Pardo Bazán, desde o pasado mes de xaneiro xa co conxunto en mans do Estado, e o propio Pazo, aínda que as administracións piden que esta declaración se amplíe a todos os elementos do conxunto.

A execución deste decreto tamén servirá para poñer fin á actual situación de depósito xudicial de numerosos bens.

Unha sentenza xudicial previa xa considerou que preto de medio cento de bens estaban unidos ao inmoble, de titularidade estatal, polo que o Estado tamén é propietario dos bens e, por tanto, non entran nesta posible retirada.

Tampouco entrarían nesta cuestión os 564 bens que reclamou xudicialmente a Avogacía Xeral do Estado a semana pasada, pois existen medidas cautelares respecto deles.

O Conselleiro de Cultura agarda que o Estado reclame unha medida cautelar para que non se execute a retirada das pezas do Pazo sen que previamente o xulgado de Madrid se posicione respecto dos bens que o xulgado da Coruña posibilita sacar de Meirás.