Xa están no mercado os primeiros pementos de Herbón da temporada
Xa están no mercado os primeiros pementos de Herbón da temporada
Os produtores prevén unha boa campaña polas boas condicións que tiveron
Arrancou a campaña do pemento de Herbón. Polo momento son poucos os que chegaron ao mercado. Malia que durante o inverno as condicións climáticas foron óptimas para a planta, nestes últimos días a baixada de temperaturas nocturnas atrasa o crecemento do pemento.
Son os primeiros pementos de Herbón recollidos pola sociedade A Pementeira en Padrón. Gústalles dicir que son os gardiáns da semente tradicional que conservan case intacta de xeración en xeración desde hai tres séculos.
A campaña, que se estende de maio a outubro, prevese boa. As condicións foron óptimas para o desenvolvemento das plantas, aínda que nos últimos días freou polas baixas temperaturas nocturnas.
E é que a sona dos pementos de Herbón atravesa fronteiras e o aumento da venda por Internet permite que cheguen a miles de quilómetros.
No comezo da campaña, cando a demanda supera a oferta, o prezo adoita ser máis alto, entre 5 e 8 euros a bolsa de 400 gramos da IXP. A medida que avanza a temporada, o prezo baixa. O ano pasado comercializaron 80 mil quilos de pemento de Herbón. A previsión é similar para esta campaña.
