Xa podemos percorrer Galicia nos trens turísticos de Renfe
Xa podemos percorrer Galicia nos trens turísticos de Renfe
Xa están dispoñibles as 14 rutas que nos levarán por zonas moi características
A nova tempada arrincou este sábado coa ruta das camelias en flor
Galicia xa se pode visitar de norte a sur nos trens turísticos. Dende este sábado 11 de marzo e ata outubro, Turismo de Galicia en colaboración con Renfe pon a disposición dos viaxeiros e viaxeiras máis de 2.600 prazas para gozar da historia, da gastronomía e da paisaxe da nosa comunidade.
A novidade deste ano é a ruta das camelias en flor que se inauguraba este sábado. Tras facer parada no pazo de Quinteiro da Cruz, o tren seguiu o seu camiño cara a Arcade, onde os pasaxeiros, acompañados dunha guía, seguiron a súa ruta polo castelo de Soutomaior.
A súa viaxe rematou no pazo de Rubiáns. O prezo por pasaxeiro é de 45 euros o adulto e 20 os cativos de 3 a 13 anos. As reservas poden facerse a través da web ou nos despachos de Renfe. Comezaron en 2013 e hai quen repite ano tras ano.,
Nun só día poderán visitar adegas, cantís, pazos, vilas históricas e mesmo castelos. E o mellor de todo, pódese facelo nun medio de transporte sostible.
