Xulgan un home na Coruña por un dobre intento de asasinato
Enorme contraste entre a Fiscalía, que pide catorce anos por dous intentos de asasinato, e a acusación, que o reduce a un ano por quebrantar a orde de afastamento
O detido, que leva estes quince meses en prisión, recoñece un delito de lesións
Xuízo na Coruña por un dobre intento de asasinato. O acusado enfróntase a catorce anos de prisión por agredir unha exparella da muller que tamén fora parella del diante dela.
"Estábame provocando", dixo o acusado a preguntas do fiscal.
O acusado entrou nun bar da Coruña a madrugada de Noiteboa do 2023, sabendo que dentro estaba a súa exparella, da que tiña unha orde de afastamento, cun grupo de acompañantes, un deles tamén exparella da muller.
"Dicíame que o supere", engadiu.
Así que o detido saíu do bar, colleu un coitelo que viu tirado na rúa, segundo relatou, volveu entrar e leouse.
"Quebrantou a orde de afastamento e a continuación saíu do bar e volveu entrar cun coitelo e agrediu un dos acompañantes que estaba coa miña clienta, pero a ela non fixo ningún intento ni ningún amago de lesionala nin provocarlle ningún dano físico", explica a avogada da muller.
É a clave deste xuízo. A acusación só pide un ano de prisión por ese incumprimento da orde de afastamento. A fiscalía, pola súa parte, solicita catorce por dous intentos de asasinato, un contra o home que recibiu as coiteladas e outro contra a muller.
O acusado, en prisión estes quince meses, recoñece as lesións por celos, pero non intención de matar.
"Estamos nunha tentativa de asasinato onde temos unhas lesións que foron sete días non impeditivos, é dicir, foron lesións mínimas. Se quixese matar a alguén, conseguiríao ou polo menos as lesións serían moito peores, moito máis graves. Existen unhas lesións cun instrumento perigoso, iso si que o recoñecemos, pero non había ese afán de matar a ninguén e moito menos a que fora súa parella", sinala o avogado da defensa.
A defensa vai alegar un problema de alcolismo. Tanto a muller como a única persoa que quedou lesionada confirmaron, a preguntas do fiscal, que ía "tomado".
