Parte o barco da ONG española Open Arms con 200 toneladas de alimentos para Gaza

O barco da ONG española Open Arms, cargado con 200 toneladas de axuda humanitaria para a Franxa de Gaza, partiu este martes do porto chipriota de Larnaca co fin de abrir un corredor marítimo para aliviar a crise humanitaria no enclave palestino.

Tras varios atrasos desde o domingo, a nave partiu pouco antes das 07:00 GMT de hoxe, informaron a EFE fontes de Open Arms e da World Central Kitschen (WCK), unha ONG fundada polo chef español José Andrés.

WCK coopera co Goberno de Emiratos Árabes Unidos, Chipre e Open Arms para enviar "o primeiro cargamento marítimo de axuda humanitaria a Gaza", indicou a oenegué nun comunicado. "Tras semanas de preparación, o noso equipo en Chipre cargou case 200 toneladas de alimentos no barco de Open Arms que entregará a axuda desesperadamente necesaria", engadiu.

No enclave palestino, "WCK serviu máis de 35 millóns de comidas en Gaza desde outubro", destaca a nota, e lembra que "a situación segue evolucionando rapidamente". En Gaza, a axuda será recibida por equipos de WCK.

A operación das dúas ONG españolas comezou a planearse hai meses, e o barco de Open Arms levaba en Chipre desde mediados de febreiro para abrir un corredor marítimo con Gaza e aliviar a dura situación humanitaria causada polo bloqueo de Israel e polos seus duros ataques de castigo en resposta aos atentados do grupo islamista Hamas do pasado 7 de outubro.

A operativa conta coa autorización do Goberno de Chipre, de Israel e a Autoridade Nacional Palestina, segundo Open Arms. A embarcación transporta ao enclave palestino unhas 200 toneladas de alimentos, como fariña, arroz e latas de atún para a poboación palestina, ameazada pola fame negra tras cinco meses de guerra entre Israel e Hamas.