Evacúan ao hospital por intoxicación catro membros dunha familia de Vigo

Catro membros dunha familia de Vigo tiveron que ser evacuados da súa vivenda con síntomas compatibles cunha intoxicación por monóxido de carbono. Os bombeiros e a Policía Local que se trasladaron ata o lugar dos feitos comprobaron unha alta concentración de monóxido no domicilio debido á mala combustión dunha estufa de butano. 

Ocorreu no barrio vigués de Lavadores. Tres dos afectados estaban no domicilio cando comezaron a sufrir os síntomas pola intoxicación, e un cuarto, un menor, xa estaba no colexio cando comezou a encontrarse mal. 

Tras realizar unha inspección da vivenda, axentes da Policía Nacional e Local, xunto a unha dotación de bombeiros, confirmaron unha alta concentración de monóxido de carbono. Unha ambulancia trasladou os afectados ao hospital Álvaro Cunqueiro con síntomas compatibles cunha intoxicación. 

A mala combustión dunha estufa de butano foi a causa do accidente.