Enagás volverá presentar o hidroduto Guitiriz-Zamora á convocatoria PIC 2024

Enagás informou de que o hidroducto Guitiriz (Lugo)-Zamora da rede de hidróxeno verde é "unha prioridade" para esta empresa, ademais de anunciar que a compañía volverá presentar esta iniciativa á próxima convocatoria europea de Proxectos de Interese Común (PIC) no ano 2024.

"A Comisión Europea seleccionou na lista presentada esta semana de PCI só aqueles proxectos que, tras a análise realizada, considerou que son necesarios neste momento para as interconexións -neste caso para levar hidróxeno renovable producido en España ata o corredor H2Med-", di Enagás nun comunicado, "diferenciándoos dos proxectos que, polas súas características ou formulación, considera que son necesarios para atender a demanda nacional".

Como promotor actual do proxecto, "Enagás incorporou o eixe Guitiriz-Zamora no proceso de Call For Interest, para dimensionar o interese dos principais axentes do sector enerxético no desenvolvemento das infraestruturas necesarias para transporte de hidróxeno renovable". De feito, cos datos obtidos, anuncia que "volverá presentalo á próxima convocatoria de PCI, a finais de 2024".

Despois de que este proxecto fora presentado á convocatoria de PCI por Reganosa en decembro de 2022, as dúas compañías pecharon un acordo en setembro deste ano 2023 polo que Enagás pasou a ser o promotor do eixo Guitiriz-Zamora.

A compañía asegura que “continuará impulsando e desenvolvendo os traballos necesarios para poñer en marcha o proxecto deste hidroduto, ao mesmo tempo que o resto dos eixes da Rede Troncal Española de Hidróxeno”. Precisa, ademais, que "promoverá o desenvolvemento de proxectos como o de Guitiriz-Zamora e outros que tras a análise dos resultados da Call For Interest se consideren necesarios na Rede Troncal Española de Hidróxeno" para atender a demanda nacional, con independencia da súa inclusión na lista de PCI.

O presidente da Xunta asegurou que intentarán que se modifique a exclusión de Galicia da rede de hidróxeno verde

O presidente da Xunta de Galicia, Alfonso Rueda, asegurou que o goberno galego intentará que Galicia se incorpore ao deseño do trazado principal da rede de hidróxeno verde por España que o Goberno presentou ante a Comisión Europea. Ao termo da reunión semanal do Consello da Xunta, Rueda asegurou que "se fora noutras comunidades autónomas estou seguro de que a decisión final sería diferente".