Ence únese á Alianza polo Clima

A empresa Ence Enerxía e Celulosa adheriuse este luns á Alianza polo Clima que impulsa a Xunta de Galicia para contribuír ao avance da mellora ambiental e frear os efectos do cambio climático na comunidade galega.

Foi no transcurso dun acto que, celebrado na fábrica que a industria pasteira ten en Pontevedra, estivo presidido pola vicepresidenta segunda da Xunta de Galicia e conselleira de Medio Ambiente, Territorio e Vivenda, Ángeles Vázquez.

Vázquez celebrou a incorporación de Ence a esta alianza, que agrupa xa a 95 entidades, para "seguir creando sinerxías" na loita contra o quecemento global, situando Galicia "á cabeza" das rexións europeas que combaten o cambio climático. A "corresponsabilidade" entre as administracións públicas e as empresas privadas, segundo a conselleira, "permítennos ser máis fortes na gran loita contra o cambio climático", xa que estas entidades asumen as liñas estratéxicas marcadas polo goberno galego.

O director territorial de Ence en Galicia, Antonio Casal, destacou pola súa banda que formar parte desta alianza é un "novo paso" no compromiso da compañía con Galicia e supón unha "oportunidade única" para seguir avanzando nun desenvolvemento industrial sostible. "En Ence apostamos por un futuro sostible para Galicia do que queremos formar parte", subliñou Casal tras asinar a adhesión desta industria á Alianza polo Clima.