Illa, contra os que están na crispación e os que instrumentalizan o CXPX

O líder dos socialistas cataláns, Salvador Illa, defende o compromiso político do PSOE fronte aos que están sempre na rúa, na crispación e en que se rompe España.

Salvador Illa participou este domingo en Bilbao no acto de presentación do candidato socialista a lehendakari, Eneko Andueza, ao que tamén asistiu o voceiro do grupo socialista no Congreso, Patxi López.

Na súa intervención, Illa lembrou que esta semana se celebran dous aniversarios moi distintos: o mércores, o da Constitución, coa que todos os españois se puxeron de acordo nun marco de convivencia, dixo. E este luns o Consello Xeral do Poder Xudicial cumprirá cinco anos co mandato caducado.

"Ese que algúns instrumentalizan, ese que algúns que se dan golpes no peito coa Constitución, bloquean".

A festa da Constitución chega uns días despois da primeira reunión entre o PSOE e Junts celebrada en Suíza coa presenza dun verificador internacional. O líder dos socialistas cataláns non fixo referencia a este encontro, pero si defendeu o respecto e o compromiso político para chegar a acordos e transformar as cousas.

"Outros están na crispación, rompe todo, rompe España, desaparece a nación, vai desaparecer Cataluña, non desaparece nada".

Mentres, a voceira de Junts no Congreso, Míriam Nogueras, que tamén participou na reunión do sábado en Suíza, declarou este domingo nunha entrevista no xornal do partido, que o prezo dos votos de Junts en Madrid é que conseguir que Cataluña sexa cada vez máis forte.