Oubiña reclama un millón e medio de euros de indemnización pola serie 'Fariña'

O exnarcotraficante Laureano Oubiña reclama un millón e medio de euros de indemnización a Bambú Producións, produtora da serie Fariña. O xuízo celebrado este martes no xulgado de Vilagarcía quedou visto para sentenza pola demanda interposta por Oubiña contra os creadores da serie, a cal recrea o auxe dos clans da droga en Galicia durante os anos 80 e 90.

O seu avogado, Jorge Paladino, sostivo que a serie vulnerou a imaxe de Laureano Oubiña ao "exceder o límite" e recorrer ao insulto e á calumnia para caracterizar ao seu personaxe, ao vincularlle con feitos "que non son certos" e que lle "provocaron danos", concluíndo que a ficción atentou contra a súa honra, imaxe e intimidade.

Ademais, nega o financiamento de campañas políticas en Galicia ou o tráfico de cocaína como se reflicte na serie, limitando a súa actividade ao contrabando de tabaco e ao haxix.

"É certo que Laureano ten unha actividade pública, vai a entrevistas cos medios e conta a súa verdade ou ten un histórico penal moi grande, pero iso non dá dereito a que se vulneren os seus dereitos fundamentais", subliñou o seu avogado.

Por outra banda, Ramón Campos, produtor executivo de Bambú, defendeu que Fariña é unha ficción inspirada en feitos reais. Ademais asegurou que creou a serie "porque era algo que había que contar á xente e que chegase ao público novo" que non viviu os efectos do narcotráfico e das drogas na coñecida como "xeración perdida".  

Os avogados de Bambú Producións, Atresmedia e Netflix pediron que se desestime a demanda contra eles, facendo fincapé en que o exnarcotraficante tamén se aproveitou do éxito desta serie, pois realizou entrevistas, varios libros autobiográficos e protagonizou un documental arredor da serie. 

Ademais de defender o "indubidable interese histórico da serie", advertiron que aceptar esta demanda poñería "en grave risco" a liberdade creativa en España, xa que obrigaría a contar sempre co beneplácito dos personaxes recreados, o que equivalería a "entregarlles as chaves da censura".

Pola súa banda, o ministerio fiscal solicitou que se desestime a demanda de Oubiña, coincidindo co esixido polos avogados de Bambú, Netflix e Atresmedia. O fiscal explicou que "a súa honra non a pon en perigo a serie, senón os seus propios actos", xa que o propio Laureano Oubiña recoñeceu, nas súas aparicións públicas, ser un capo da droga e protagonizar episodios violentos relacionados con esta actividade.