Costa descúlpase e di que sente vergoña pola actuación do seu xefe de Gabinete

O primeiro ministro dimisionario de Portugal, António Costa, pediulle desculpas á poboación portuguesa e afirmou que probablemente non volverá exercer ningún cargo público, despois de renunciaren por unha investigación na súa contra por suposta corrupción e prevaricación.

"Teño o deber de desculparme", dixo nun discurso á nación, e subliñou que "coa duración previsible deste proceso xudicial, con gran probabilidade" non exercerá "nunca máis" un cargo público.

O socialista non quere "substituír" a Xustiza, pero admitiu que a incautación de sobres con diñeiro no despacho do seu xefe de Gabinete, Vítor Escária, faino sentir "traizoado" na súa confianza e dálle "vergoña".

Costa, que tras dimitir o martes asegurou que non cometeu ningún "acto ilícito", reiterou que está disposto a colaborar coa Xustiza.

"Cando alguén me queira oír nun proceso xudicial, sabe onde estou", dixo.

Ademais de Escária, outro dos detidos é Diogo Lacerda Machado, padriño de voda de Costa e, segundo dixera o propio mandatario, o seu "mellor amigo".

"Un primeiro ministro non ten amigos", asegurou este sábado o socialista, quen subliñou que Lacerda Machado non colabora co seu Gabinete desde "hai moitos anos" e que non falou con el en ningún momento sobre os negocios agora investigados.

"O que fixera ou non neste proceso, nunca o fixo coa miña autorización, o meu coñecemento ou a miña interferencia, e nunca falou comigo sobre este asunto", dixo.

Acción gobernativa

Costa pediulle á cidadanía que non se confunda a "responsabilidade individual de quen sexa" co "exercicio da acción gobernativa". Nese sentido, defendeu as políticas desenvolvidas polo seu Goberno para promover os investimentos, en concreto nos negocios de litio e hidróxeno que agora están baixo investigación.

"Á xustiza o que é da xustiza e á política o que é da política. Tamén significa que a futuros gobernos de Portugal, sexa quen sexa o primeiro ministro e os seus membros, tenlles que ser garantida a liberdade de acción política", insistiu.

Promoción do investimento

Defendeu en concreto a simplificación da burocracia implementada polo seu Goberno porque "promove a transparencia".

Asegurou que nas licenzas de minas de litio en Montalegre e Boticas, investigadas pola Fiscalía, esixiuse o cumprimento das condicións do estudo de impacto ambiental, como garantir o abastecemento de auga ou a protección do lobo ibérico na rexión.

En canto ao centro de datos en Sines, outro dos proxectos baixo investigación, Costa destacou que é o maior investimento estranxeiro en Portugal desde a chegada da fábrica de Volkswagen e remarcou que se lles obrigou a respectar as condicións de protección ambiental da zona.

"Portugal non pode desperdiciar investimentos", reiterou.

Tras a dimisión de Costa, o presidente de Portugal, Marcelo Rebelo de Sousa, anunciou eleccións anticipadas para o 10 de marzo.