Un ano e nove meses de prisión para Alberto Casero por prevaricación e malversación
Un ano e nove meses de prisión para Alberto Casero por prevaricación e malversación
A sentenza da Audiencia Provincial de Cáceres declara a Casero autor de delitos de prevaricación e malversación de cinco contratos públicos entre 2017 e 2018
O acordo ao que chegou o exalcalde de Trujillo coa Fiscalía tamén lle impón seis anos de inhabilitación e o aboamento dunha indemnización de case 70.000 euros
Deputado polo PP entre 2019 e 2023, Casero renunciou á súa acta e causou baixa no partido tras a apertura da causa por posibles delitos relacionados con contratos municipais
![O exalcalde de Trujillo Alberto Casero (2e), deputado nacional do PP na pasada lexislatura, durante a audiencia previa da causa aberta contra el por presuntos delitos de prevaricación e malversación durante a súa etapa municipal, na Audiencia Provincial de Cáceres (EFE/Vicente Roso)](https://img-g24-crtvg.flumotion.com/prog24/2023/20231128/ALBERTOCASEROXUSTIZAEFE.jpg)
Un ano e nove meses de prisión, seis de inhabilitación e o aboamento dunha indemnización de case 70.000 euros conforman o acordo alcanzado este martes entre a Fiscalía e o letrado do exalcalde de Trujillo (Cáceres) Alberto Casero por delitos de prevaricación e malversación na súa etapa municipal. "Nunca se está satisfeito por isto, pero isto é o que hai", dixo Casero á saída da Audiencia Provincial de Cáceres tras o acordo alcanzado entre as partes durante unha audiencia previa que durou pouco máis dunha hora.
O maxistrado ditou sentenza oral nestes termos de pena a cumprir tras o acordo de conformidade. A sentenza oral -a escrita será ditada nun prazo de 20 días- declara a Casero autor de delitos de prevaricación e malversación de cinco contratos públicos de servizo, patrocinio ou convenios realizados entre marzo do 2017 a decembro de 2018 nos que se incumpriu a formalidade esixida para o efecto pola normativa. Casero, asistido polo letrado Bernardo de la Rosa, non entrará en prisión e deberá abonar ao consistorio de Trujillo un pago inicial de case 10.000 euros e 1.000 euros mensuais durante 60 meses.
Alcalde de Trujillo entre 2011 e 2019, Alberto Casero enfrontábase, a teor do escrito de Fiscalía, a oito anos de prisión, a inhabilitación absoluta durante 20 anos e ao pago dunha indemnización próxima aos 70.000 euros ao consistorio. Deputado nacional entre 2019 e 2023, Casero renunciou de forma voluntaria a esta acta e a súa baixa do partido en marzo deste ano tras a proposta do Tribunal Supremo de xulgarlle por posibles delitos relacionados con estes contratos municipais.
O maxistrado do Supremo explicaba que o entón alcalde de Trujillo concertou con diferentes persoas e entidades unha serie de contratos de servizo, patrocinio ou convenios, incumprindo todo tipo de formalidade. De feito, o maxistrado apuntaba "vedadas contratacións verbais ou sen tramitación nin publicidade algunha nos supostos que a contía o requiría, elusión dos mecanismos de control, asunción directa de pagos pola integridade dos servizos que ademais de periódicos prestábanse a entidade na que o municipio só era unha parte; plenamente subsumibles no ilícito de prevaricación".
Esta causa ten a súa orixe no Xulgado de Primeira Instancia e Instrución número 2 de Trujillo, que abriu dilixencias previas en virtude dunha denuncia da Fiscalía relativa a contratos, acordos ou convenios concertados con terceiros por parte de Casero na súa etapa como alcalde. Dado que Casero era deputado nacional, o procedemento pasou ao Tribunal Supremo. Tras deixar a súa acta, o procedemento foi devolto ao ámbito xudicial cacereño.