Dezaoito fiscais do Supremo, "decepcionados" co fiscal xeral do Estado por "ignorar" os fiscais do 'procés'

Un grupo de dezaoito fiscais do Tribunal Supremo arremeteu contra o fiscal xeral do Estado Álvaro García Ortiz por "ignorar deliberadamente" a demanda de amparo formulada polos fiscais do procés, ante as "inxuriosas insinuacións" de lawfare plasmadas no acordo PSOE-Junts.

Na misiva, os dezaoito fiscais asinantes da Sección Penal do alto tribunal mostran a súa "decepción" pola "falta de vontade" de García Ortiz "de saír ao paso das inxuriosas insinuacións" sobre a actuación dos fiscais Ismael Moreno, Javier Zaragoza e Fidel Cadea, ademais de Consuelo Madrigal.

Manifestan que a comunicación do fiscal xeral do pasado día 16 "non foi outra cousa que unha forma de ignorar deliberadamente a resposta á gravísima situación que vive o Ministerio Fiscal e á demanda de amparo formulada polos fiscais do procés.

"Evitar inxerencias entre poderes" na lei da amnistía

Álvaro García Ortiz remitiu unha comunicación o pasado día 16 a toda a carreira fiscal en que manifestaba que só se pronunciará sobre a lei de amnistía, e desde un punto de vista "técnico-xurídico", cando entre en vigor, ao entender que debe evitar "calquera inxerencia nas funcións constitucionalmente atribuídas a cada un dos tres poderes do Estado".

O seu escrito estaba remitido a toda a carreira e en particular aos fiscais do procés, que nunha carta lle reclamaran que se pronunciase sobre a lei de amnistía, a creación de comisións parlamentarias para avaliar as actuacións dos "órganos xudiciais e do Ministerio Fiscal" e pola inclusión de termos "absolutamente improcedentes" como lawfare no pacto PSOE-Junts.