2023 vai camiño de converterse nun ano histórico para o turismo en Galicia
2023 vai camiño de converterse nun ano histórico para o turismo en Galicia
Máis de 2.700.000 turistas chegaron a Galicia nos primeiros seis meses deste ano
O número de visitantes no que vai de ano en Galicia leva camiño de superar as cifras de 2022, con máis de dous millóns setecentos mil turistas que visitaron a nosa comunidade, segundo subliñou no programa Bos Días o director da Axencia Turismo de Galicia.
"O que temos acumulado nos oito meses que van de ano, supera case nun dez por cento o que rexistramos en 2022, que foi o mellor ano turístico da historia", afirmou na TVG José Manuel Merelles.
O clima e a gastronomía son dous dos principais atractivos de Galicia
O trinta e sete por cento dos turistas que nos visitaron eran estranxeiros. Todos, foráneos ou nacionais, destacan o clima e a gastronomía como dous atractivos esenciais.
O Camiño de Santiago é outro dos motivos da chegada de persoas a Galicia, ata o punto de bater tamén as marcas do ano pasado.
"A estas alturas xa temos 312.000 peregrinos que solicitaron a Compostela, o que supón un dous por cento máis dos rexistrados en todo o ano pasado", engadiu José Manuel Merelles no Bos Días.
O sector turístico galego gañou máis cartos ca o ano pasado, agás a restauración
O responsable da Axencia Turismo de Galicia di que as ganancias do sector turístico de Galicia tamén son superiores ás doutros anos, agás na restauración.
