444 voos veranse afectados pola folga de Iberia dos días 5, 6, 7 e 8 de xaneiro
444 voos veranse afectados pola folga de Iberia dos días 5, 6, 7 e 8 de xaneiro
A aeroliña asegurou que vai ofrecer "as mellores alternativas posibles aos 45.641 pasaxeiros afectados"
Os pasaxeiros poderán realizar cambios a través da web de Iberia, das axencias de viaxes ou do Centro de Atención ao Cliente da compañía
UXT e CCOO anuncian unha folga de catro días en Iberia do 5 ao 8 de xaneiro
![](https://img-g24-crtvg.flumotion.com/prog24/2023/20231229/colFOLGASAEROPORTOSTORRESEIBERIA_frame_1564.png)
O grupo Iberia tivo que cancelar 444 voos programados nos catro días entre o 5 e o 8 de xaneiro, debido á folga do persoal de servizo de asistencia en terra, afectando a un total de 45.641 viaxeiros.
Dos voos cancelados que coinciden coa festividade de Reis e o retorno de milleiros de persoas aos seus lugares de traballo ou residencia, 270 corresponden a Iberia, 64 a Iberia Express e 110 a Air Nostrum.
A folga convocouse polos sindicatos CCOO e UXT despois de que Iberia perdera o servizo de asistencia en terra nos principais aeroportos do país no concurso fallado polo xestor aeroportuario Aena. As negociacións para realizar o autoservizo de asistencia en terra finalizaron sen acordo.
Iberia ten previsto operar 836, un 76 % dos 1.106 programados, e tratará de que despeguen case todos os de longo percorrido, e o máximo número posible dos de curto e medio percorrido.
Cambios e reembolsos aos clientes afectados
A aeroliña sinalou este venres que as compañías van ofrecer "as mellores alternativas posibles aos 45.641 pasaxeiros afectados polas cancelacións para que poidan realizar as súas viaxes".
Nos vindeiros días, os viaxeiros serán informados da posibilidade de recolocación noutros voos. Os pasaxeiros con voos afectados para os días 5, 6, 7 e 8 de xaneiro poden solicitar dende hoxe un cambio de data para a súa viaxe ou reembolso do importe pagado polos billetes.
Os clientes con voos non afectados directamente pola folga poderán cambiar a data da viaxe ou solicitar un bono. Estes cambios poderanse realizar a través da web de Iberia, das axencias de viaxes coas que se contratou a compra ou do Centro de Atención ao Cliente da compañía. Pese a que se reforzará o persoal deste departamento, a compañía advirte de que é posible que se teña máis tempo de espera do habitual.
Ante os previsibles problemas que se producirán nos aeroportos con motivo da folga, Iberia recomenda aos pasaxeiros que realicen a facturación con antelación na web e que acudan con máis tempo do habitual aos aeroportos.