Case un milleiro de cans de España e Portugal compiten en beleza en Silleda
Case un milleiro de cans de España e Portugal compiten en beleza en Silleda
Valórase o movemento, o carácter do animal e a súa morfoloxía
A Sociedade Canina Galega organiza tres concursos nos que participan máis de 100 razas
Un total de 126 razas diferentes participaron hoxe nesta competición de beleza canina en Silleda. Valórase o movemento, o carácter do can e a súa morfoloxía.
“Tanto a cabeza, o tipo de pelo, o movemento, é un conxunto. Hai un estándar racial e o xuíz ten que facer unha valoración do conxunto”, explica Salvador Serrano, da Sociedade Canina de España.
River é un galgo ruso. É a raza que cría un competidor de Pontevedra que leva 15 anos participando en concursos de ámbito internacional.
“Temos campións de Portugal e de España, de Xibraltar, Rusia, Francia... non nos podemos queixar”, explica.
Uva, de 8 meses, é unha malamute de Alaska que compite na categoría do mellor cachorro.
"É unha raza pola que teño paixón. Eu ademais fago "canicrós", corro con eles, é unha raza ideal para correr".
Mais alá do concurso e das características de cada raza, hai algo que teñen en común.
“O máis importante é que nos acompañan e son un membro máis da familia", asegura Agustín Fontán, presidente da Sociedade Canina Galega
Participan 800 cans en tres concursos nos que se van premiar os mellores exemplares para a cría.
