A Catedral de Santiago abre a porta de Abades ante a grande afluencia de visitantes
A Catedral de Santiago abre a porta de Abades ante a grande afluencia de visitantes
A porta de Abades estará aberta entre o mediodía e as sete e media da tarde para facilitar o acceso dos peregrinos á Catedral
"De Portugal". "De Viseu". "De Nápoles". "De Ferrol". "De Miami, Florida".
Son algúns dos peregrinos e turistas que facían ringleira para entrar na Catedral de Santiago. Ante a grande afluencia de visitantes, o templo decidiu abrir de xeito temporal a porta de Abades, situada na parte alta da Quintana. Os tempos de espera chegaban o domingo á tarde aos 30 minutos.
"Sobre media hora, pero lévase ben, gustounos moito a cidade".
Entre os que agardaban había quen facía a ringleira por segunda vez. Pola mañá, o tempo de espera para acceder pola porta das Praterías aínda era maior.
"Agora hai menos xente, pola mañá estivemos na outra porta. Chegamos ao mediodía e xa paramos e marchamos, había que esperar moito".
Desde esta porta, que se empregaba como saída, os visitantes teñen acceso directo á cripta e á estatua do Apóstolo.
"Vimos abrazar o Thiago".
"Un dos meus fillos ten necesidade de pedir un desexo e vimos abrazar o Apóstolo".
Durante as próximas semanas, a porta de Abades seguirá aberta entre o mediodía e as sete e media da tarde para facilitar o acceso dos peregrinos á Catedral.
