A China aumentará ata o 125 % os aranceis aos produtos dos Estados Unidos

A China anunciou este venres que aumentará do 84 % ao 125 % os aranceis sobre todos os produtos importados desde os Estados Unidos, como resposta ao novo paquete aprobado por Washington.

A medida, que entrará en vigor o 12 de abril, foi confirmada polo Comité de Aranceis Aduaneiros do Consello de Estado nun comunicado oficial, no que condenou a política comercial estadounidense por "violar gravemente as normas do comercio internacional" e actuar con "unilateralismo coercitivo".

"Os Estados Unidos ignoraron a orde económica global que axudou a construír tras a Segunda Guerra Mundial", indica o texto, que engade que A China "condena enerxicamente" as últimas medidas e que a súa paciencia ten límites.

"Se Washington insiste en inflixir danos substanciais aos intereses de China, esta responderá con firmeza e acompañarao ata o final", apunta o texto oficial.

A pesar da dureza do ton, Beijing precisou que os aranceis xa deixaron sen mercado real aos produtos dos EUA na China, polo que calquera aumento adicional carecerá de sentido económico, será "irrelevante" e "acabará convertido nunha burla na historia da economía mundial", segundo o comunicado.

Esta medida chega dous días despois de que Beijing elevase do 34 % ao 84 % os aranceis aos bens estadounidenses, en represalia ao gravame do 50 % que Trump impuxo previamente aos produtos chineses.

Washington respondeu elevando aínda máis os aranceis ata o 125 %, o que, sumado a cargas anteriores, deixa un total impositivo acumulado do 145 % sobre as importacións chinesas.

O portavoz do Ministerio de Exteriores chinés, Lin Jian, afirmou este venres que o seu país "non desexa unha guerra comercial, pero non a teme", e esixiu a Washington "deixar as presións" se realmente busca resolver as tensións "pola vía do diálogo".

Segundo Lin, as contramedidas chinesas "non só protexen os seus propios intereses lexítimos, senón que tamén salvagardan a orde internacional e os dereitos de todos os países afectados polo unilateralismo estadounidense".

A China xa advertiu de que non permitirá que se lle impoñan condicións desiguais en futuras negociacións, e que calquera diálogo "debe basearse na igualdade e o respecto mutuo". 

O IBEX 35 pecha cunha baixada do 0,18%

O IBEX 35, principal indicador da Bolsa española, pechou este venres cun descenso do 0,18 %, o que supón un retroceso semanal do 1 %, tras unha semana marcada pola elevada volatilidade provocada pola escalada da guerra arancelaria entre Estados Unidos e China.

O índice perdeu 21,6 puntos na última sesión e situouse nos 12.286 puntos. No que vai de ano, o IBEX aínda mantén un balance positivo, cun avance acumulado do 5,96 %.

Os mercados europeos deixaron atrás a euforia rexistrada na xornada anterior, afectados pola evolución negativa de Wall Street na sesión do xoves e pola crecente tensión comercial entre as dúas maiores economías do mundo, que volveu xerar incerteza nos investidores.