A conserveira Jealsa súmase á Alianza Galega polo Clima

O grupo empresarial Jealsa adhírese á Alianza Galega polo Clima que se puxo en marcha o ano pasado para unir os principais axentes económicos e sociais e sumar esforzos na loita contra o quecemento global e o cambio climático, e para que desta forma coordinada todas as iniciativas privadas teñan un impacto real.

Con motivo desta nova incorporación, Jealsa recibiu hoxe a vista da conselleira de Medio Ambiente, Territorio e Vivenda para a sinatura do compromiso da conserveira. Con ela son xa 50 as empresas e institucións que se suman a esta iniciativa de loita contra o cambio climático. 

"Adhesións entre as que temos que salientar as universidades, as autoridades portuarias, pero tamén as mellores empresas de Galicia", dixo Ángeles Vázquez.

Jealsa é unha das maiores conserveiras de Galicia. Ten case 4.000 traballadores, 7 fábricas e unha facturación, o ano pasado, rozando os 800 millóns de euros. Desde a empresa manteñen que este crecemento económico sempre estivo acompañado por unha forte aposta pola sostibilidade. 

"Esta convicción e este esforzo abandeirado polo noso programa RSC We Sea permitiunos acadar grandes fitos como o aproveitamento ao 100 % da materia prima que entra nas nosas instalacións ou termos convertido xa nunha compañía neutra en carbono a nivel de produción, grazas á enerxía que xeramos nos parques eólicos", explicou Carlota Alonso, directora adxunta de márketing de Jealsa.

O obxectivo da Alianza Galega polo Clima é que todas estas empresas sumen as súas estratexias de loita para así, xuntas, acadar un impacto real no planeta que permita como país, cumprir cos retos marcados na Axenda 2030.