A Coruña dá 72 horas para recoller o lixo ou declarará emerxencia sanitaria

A alcaldesa da Coruña Inés Rey anunciou este venres que deu 72 horas á empresa concesionaria de recollida de lixo, Prezero, para que recolla os residuos acumulados nas rúas durante un mes de folga ou, en caso contrario, o luns declarará a emerxencia sanitaria e contratará outra compañía.

Tras unha reunión coa Federación de Asociacións Veciñais da Coruña, Inés Rey compareceu ante os medios para explicar as medidas que adopta o Concello "de forma inmediata" para "poñer fin á folga de recollida de lixo e á situación" derivada dela.

O Concello enviou un requirimento a Prezero no que dá 72 horas para que "tome as medidas necesarias para devolver a cidade á normalidade e a unha situación óptima de salubridade".

No caso de que isto non suceda, o luns 22 ás 8 horas declarará "a emerxencia sanitaria na cidade" e contratará outra empresa, con cargo a Prezero, para a "recollida de forma excepcional" do lixo, porque neste momento "danse as condicións sanitarias, ambientais e legais".

O que ocorre na actualidade, segundo Rey, é "unha chantaxe á cidade" nun momento da folga convocada polo Sindicato de Traballadores da Limpeza (STL), maioritario, en que asegura que non sabe o que piden con estes paros, que en teoría son intermitentes, aínda que na práctica foron diarios e anunciaron que serán indefinidos a partir de agosto.

Por iso apelou a "non ceder ante estes conflitos e non resolvelos", porque "se acabou o tempo das cesións e chega o tempo das solucións", de maneira que espera que esta resposta sirva "a longo prazo", aínda que asume o "custo" que lle supoñerá.

"A cidadanía merece máis, merece firmeza, merece rigor e merece determinación para acabar cunha situación inxusta", proseguiu.

Esta decisión chega tras semanas de recompilar "todas as probas con informes policiais, ambientais e xurídicos" e despois dunha noite con dez incendios urbanos iniciados en contedores —os danos no mobiliario urbano suman uns 250.000 euros—, nunha serie de "prácticas de carácter violento que poñen en risco a cidade".

"Atentar contra o patrimonio público e poñer en risco a vida dos cidadáns excede calquera tipo de reivindicación", lamentou e avanzou un reforzo na vixilancia policial tras unha noite con catro identificados polo seu suposto vínculo cos lumes que forman parte do persoal.

O STL abriuse esta semana a ter a cidade limpa en dous ou tres días se se retiran as sancións contra os traballadores.

A empresa, pola súa banda, publicou en prensa unha oferta de traballo para o servizo de recollida de lixos na Coruña na que incluíu que o salario é de entre 28.300 e 33.300 euros.

Tras os incidentes desta madrugada, con novas queimas de colectores, a policía identificou catro persoas, que forman parte do cadro de persoal, polo seu suposto vínculo coas queimas. E calculan en preto de 250 mil euros os danos provocados no mobiliario urbano desde que comezou a folga.