A economía galega repunta e crece un 3,2 % interanual en maio, segundo o Indicador Abanca

O Indicador Abanca-Foro de Conxuntura Económica de Galicia rexistrou en maio un incremento interanual do 3,2 %, dúas décimas máis que o mes anterior, e consolidou a senda alcista que se recuperou no mes de febreiro.

O indicador alcanzou niveis que non se rexistraban desde agosto de 2022, cando presentaba o mesmo valor, explican os expertos do foro.

Así, confírmanse as previsións optimistas con que comezara 2024, e o comportamento da actividade económica mellora as expectativas con que finalizou 2023.

Once das quince variables que analiza o indicador mostran un crecemento positivo (dous máis que o mes pasado) e, entre elas, sobresaen o comportamento do transporte marítimo de mercadorías e o da produción de vehículos de turismo, que no mes de maio experimentaron incrementos superiores ao 30 %.

En cambio, o índice da cifra de negocios nos servizos sitúase como a variable do indicador cun peor comportamento ao diminuír en algo máis dun 1 % en termos interanuais.