Abanca duplica o seu beneficio tras gañar 988 millóns ata setembro

Abanca obtivo un beneficio neto atribuído de 988,1 millóns entre xaneiro e setembro, o que supón un 130 % máis que no mesmo período do ano pasado, debido, en parte, á integración do banco portugués EuroBic.

Sen esta entidade, as ganancias da compañía alcanzarían os 638 millóns, un 48,8 % máis, segundo as contas presentadas este mércores por Abanca, que reivindica que estes "sólidos resultados" están fundamentados nun crecemento "eficiente" do negocio, que supera os 127.000 millóns de euros.

"A entidade consolídase como un dos competidores máis sólidos no mercado ibérico tras a adquisición de EuroBic, que achega un negocio rendible e saneado de máis de 12.000 millóns", engaden. Desta maneira, a rendibilidade recorrente da empresa alcanza o 16,9 %, presentando á súa vez uns "robustos" niveis de capitalización, unha "máxima" calidade de activos e unha "cómoda" posición de liquidez, destacan desde Abanca.