A Xunta de Galicia investirá 18 millóns de euros na mellora do pazo de Lourizán
A Xunta de Galicia investirá 18 millóns de euros na mellora do pazo de Lourizán
Restaurarase o edificio principal do pazo e os itinerarios e instalacións do xardín botánico
Tamén se construirá unha sala polivalente e ábrese a posibilidade de albergar establecementos de aloxamento turístico ou restauración nas instalacións
![EFE / Salvador Sas](https://img-g24-crtvg.flumotion.com/prog24/2023/20230731/lourizan-novos-usos-boa.png)
A Xunta de Galicia pretende consolidar o pazo de Lourizán, en Pontevedra, como centro de referencia forestal cun investimento de 18 millóns de euros para mellorar as instalacións.
Nunha visita a este inmoble este luns, o presidente da Xunta, Alfonso Rueda, mostrouse convencido de que os labores de restauración e deseño de novos usos e actividades do pazo de Lourizán que executará o Goberno autonómico lograrán impulsar o "rexurdimento definitivo" dunhas instalacións cun amplo valor histórico e ambiental.
O obxectivo é impulsar o complexo de Lourizán desde o punto de vista académico e cultural, pero tamén social, recreativo, paisaxístico e turístico.
Con ese propósito vai acometer unha restauración “necesaria e rigorosa” do edificio principal do pazo, así como dos itinerarios e instalacións do xardín botánico, “un tesouro como hai poucos en España e Europa”, en palabras do titular da Xunta.
Tamén se construirá unha sala polivalente de madeira e ábrese a posibilidade de albergar establecementos de aloxamento turístico ou restauración en parte das instalacións.
Rueda apuntou que o proxecto da Xunta busca consolidar Lourizán como un centro de estudo, investigación e divulgación forestal, un lugar de referencia para formarse nesa materia e un punto de encontro entre todos os axentes públicos e privados deste campo.
Anunciou o presidente do Executivo autonómico que este mesmo ano vai seleccionar a proposta gañadora do concurso de ideas sobre os novos usos e actividades de Lourizán e no primeiro trimestre de 2024 comezará a elaboración do proxecto elixido coa previsión de poder comezar as obras ese mesmo ano.
O pazo, que está incluído no Catálogo de Patrimonio Cultural de Galicia, acolleu en 1898 as negociacións do Tratado de París (a cesión das colonias de Cuba, Porto Rico e as Filipinas) cando o inmoble era propiedade de Eugenio Montero Ríos.