A Fiscalía pide 24 anos de cárcere para o presunto asasino de Jessica Méndez

A Fiscalía solicita 24 anos de cárcere por asasinato para o home que o 17 de marzo de 2022 provocou unha colisión entre vehículos en Barro para matar a unha veciña, a moza Jéssica Méndez, que entón tiña 29 anos.

Segundo o escrito do Ministerio Público os feitos correspóndense cun delito de asasinato coa agravante de xénero, porque "durante varios anos" o procesado "nunca obtivo unha resposta" por parte da vítima ás súas "pretensións sentimentais ou afectivas".

Os feitos sucederon na mañá do 17 de marzo de 2022. O home circulaba co seu coche pola N-550 en sentido a Santiago de Compostela e, cando se achegaba ao quilómetro 104,700 desta estrada, no concello de Barro, veu que a muller estaba a esperar no seu propio vehículo para incorporarse á vía principal desde unha secundaria.

Entón, segundo relata Fiscalía, o investigado "recoñeceu o vehículo" da muller e, "co ánimo de acabar coa súa vida", impactou contra o seu coche a máis de 80 quilómetros por hora.

A colisión produciuse contra o lateral no que estaba a condutora "e a propósito" consciente de que o choque a esa velocidade "pode ocasionar a morte". De feito, engade o Ministerio Público, este xeito de proceder non lle deu "ningunha posibilidade de reacción ou de defensa".

Jéssica Méndez sufriu unhas feridas de tal gravidade que estivo en coma durante horas, ata que á mañá seguinte, o 18 de marzo de 2022, faleceu. O home foi detido o día 21 e desde entón permanece en prisión provisional.

Matouna polo "odio que lle xerou o seu silencio"

En canto á motivación do crime, a Fiscalía sostén a agravante de xénero porque a "postura de indiferenza ou de invisibilidade do investigado" que mantiña a muller contra el "non era unha conduta esperable do xénero feminino para a mentalidade do investigado". Matouna "pola indignación ou o odio que lle xerou o seu silencio ou o seu desprezo", engade.

O Ministerio Público solicita para el unha pena de cárcere de 24 anos como autor dun asasinato, xa que considera que houbo aleivosía. Tamén pide unha prohibición de comunicación e achegamento cos familiares da vítima a un quilómetro do seu domicilio, lugar de traballo ou calquera lugar onde se atopen durante 10 anos.

Xunto a isto, solicita unha indemnización, en concepto de responsabilidade civil, máis de 128.000 euros á parella da muller, case 100.000 a cada un dos pais e máis de 28.000 euros a cada un dos seus dous irmáns.