A Fiscalía pide 4 anos e 9 meses de cárcere para Ancelotti por suposta fraude a Facenda

A Fiscalía de Madrid solicita catro anos e nove meses de prisión para o técnico do Real Madrid Carlo Ancelotti por supostamente defraudar a Facenda máis dun millón de euros nos exercicios fiscais de 2014 (386.361 euros) e 2015 (675.718 euros).

Segundo informou o Ministerio Público este mércores, a Fiscalía impútalle dous delitos contra a Facenda Pública, xa que a pesar de que Ancelotti afirmou que era residente en España a efectos fiscais e reflectiu que o seu domicilio estaba en Madrid, só consignou nas súas declaracións da renda as retribucións de traballo persoal percibidas do Real Madrid e omitiu o rendemento correspondente á explotación dos seus dereitos de imaxe que cedera a outras entidades.

No seu escrito a Fiscalía subliña que “co fin de eludir a tributación polos rendementos dos devanditos dereitos de imaxe”, tanto os recibidos polo Real Madrid como doutras marcas por eventos varios, o técnico acudiu a unha “complexa” e “confusa” trama de fideicomisos e sociedades interpostas para canalizar a cobranza dos dereitos de imaxe.