A Fiscalía querélase contra Naturgy por un "incremento abusivo dos prezos"
A Fiscalía querélase contra Naturgy por un "incremento abusivo dos prezos"
A compañía abusou da súa posición dominante no mercado eléctrico para obter un beneficio inxustificado de 43,2 millóns de euros
Naturgy nega manipular o prezo do mercado eléctrico
![](https://img-g24-crtvg.flumotion.com/prog24/2024/20240606/naturgy.png)
A Fiscalía da Audiencia Nacional presentou unha querela contra a empresa Naturgy Xeración ao considerar que cometeu un delito co "incremento abusivo dos prezos de produción enerxética na central térmica de ciclo combinado de Sabón 3, en Galicia, desde marzo do 2019 a decembro de 2020, coincidindo coa situación de crise económica e social derivada dos efectos do COVID-19".
A xuízo da Fiscalía, a compañía "abusou da súa posición dominante no mercado eléctrico de axustes técnicos".
E fíxoo, din, "adoptando, de modo consciente e deliberado, unha estratexia de ofertas a prezos non equitativos e moi por encima dos resultantes de contornas de maior competencia, obtendo un beneficio inxustificado de 43,2 millóns de euros, que xerou un sobrecusto para as entidades comercializadoras e, en último termo, para os consumidores".
O Ministerio Fiscal considera que a compañía puido incorrer nun delito relativo ao mercado e aos consumidores ao ocasionarse "un prexuízo ilícito para os dereitos e intereses dos consumidores e usuarios do sector eléctrico".
A Fiscalía considera que a competencia para coñecer destes feitos recae na Audiencia Nacional en tanto que a súa Sala do Penal coñece do axuizamento das causas por delitos relativos a defraudacións e maquinacións para alterar o prezo das cousas, que produzan ou poidan producir grave repercusión no tráfico mercantil, na economía nacional, ou prexuízo patrimonial nunha xeneralidade de persoas no territorio de máis dunha audiencia.
As dilixencias iniciáronse con motivo da denuncia presentada por FACUA, e contouse con documentación e informes remitidos pola Comisión Nacional dos Mercados e a Competencia (CNMC).
Naturgy nega manipular o prezo do mercado eléctrico
Pola súa banda, Naturgy negou manipular o prezo do mercado eléctrico, pois fontes da compañía afirmaron a EFE que Naturgy estudará o contido da querela cando lle sexa notificada e realizará "todas as actuacións procesuais precisas para demostrar que sempre actuou con pleno respecto á lexislación".
A empresa recalca que "no período investigado pola CNMC, a central de Sabón rexistrou perdas superiores aos 6 millóns de euros".
Reitera, ademais, que o Tribunal Supremo autorizoulle recentemente a pechar dez das súas plantas de xeración, tal e como solicitara a propia Naturgy, "por non resultarlle rendible actuar nese mercado".
A enerxética afirma que "segundo publicaron algúns medios, a querela basearíase nun expediente sancionador previo da CNMC, que se atopa recorrida por Naturgy ante a Audiencia Nacional, e por tanto, a día de hoxe, non é firme".
Indica ademais que a empresa lanzou nos últimos anos diversas "tarifas competitivas" para contribuír a mitigar o impacto do prezo da enerxía nas economías domésticas.
"Xa en 2021 Naturgy adiantouse varios meses ás medidas públicas para conter a subida do custo a enerxía a través da súa iniciativa Compromiso Luz a 65 €/MWh por tres anos, destinada a mitigar a forte escalada rexistrada no mercado eléctrico", sinalan as fontes da compañía.